adachan

【純分享】 原來敷面膜都有技巧 敷錯分分鐘搞到皮膚越來越差

敷咗面膜咁多年，你係咪敷得啱？雖然自問都唔係咩美容達人，但近幾日見到有明星分享敷面膜心得，搞到我又想分享下我嘅護膚心得…

好耐之前范冰冰話佢皮膚keep住咁靚係因為日日都敷面膜，相信好多人聽完之後都應該有跟住做，其中一個就係我，不過我連續敷咗一個星期（保濕面膜，本身係乾性皮膚）之後就無再繼續，皆因日日敷真係要好有恆心（自問撐咗一個星期算唔錯）。其二連敷一星期7日好似皮膚都無好過咁，感覺同之前一樣，所以就無再敷。

而最近阿嬌都分享咗話mask其實唔需要日日敷，因為面膜會令肌膚飲飽水，皮膚水潤到一個點時，透氣性會變弱，長期落去皮膚就會無法適應乾燥嘅環境，令到抵抗力變差，一轉天氣就GG，所以建議一星期最多敷3次就夠。

不過我有聽過幾個美容師講，保濕面膜話可以日日敷，其他嘅一星期兩三次就夠。宜家嘅我都係keep住一星期2-3次~~

另外，有時paper mask入面啲精華太多，我會keep返起佢，第二日沖完涼就薄薄搽一層係面，當做個簡單嘅保濕。不過有陣時啲精華唔算太多嘅時候，我都會倒晒落面，慢慢按摩等皮膚吸收，我覺得咁樣好似敷完之後即刻感覺水潤咗。

其次，有啲paper mask講明話無需要洗面，慢慢按摩至吸收晒就ok。但我就覺得有啲敷完太痴粒粒都會用紙巾濕少少水抹下，唔會直接洗，硬係覺得直接洗好似連啲精華都洗得一乾二淨（雖然抹可能都會抹走啲精華，但感覺點都有少少淨咗係塊面上）。

最後，唔知啱定錯啦，阿嬌有提過唔好妝前敷mask，咁嘅話會令角質層含水量瞬間增加，對光線嘅折射率也同步提高，令化妝品中嘅化學成分急速進入皮膚。但我認為如果出席嘅場合太重要嘅可以事前早一兩個鐘敷咗先，畢竟我都覺得敷完再化妝係比較貼服啲。

Tag：

敷面膜好處, 敷面膜要小心, 正確敷面膜法, 范冰冰, 阿嬌, 鍾欣潼,